இதுக்கப்புறமும் யாராவது ஆஸ்கார் பற்றி பேச ஆசைப்படறிங்களா ?

சிலநாள் முன்பு நண்பர் ஒருவரை பார்ப்பதற்காக மயிலாப்பூர் வரை சென்றிருந்தேன். நகரில் தேசிய முற்போக்கு திராவிடர் கழகத்தின் இளைஞர் அணி மாநாடு நடப்பதால் வெளியூரில் இருந்து பஸ், லாரி, வேன், கார், பைக், சைக்கிள், கால்நடை என பல ரூபத்திலும் கட்சியின் இளைஞர்(?) அணியினர் தீவுத்திடலை நோக்கி படையெடுத்த வண்ணமிருந்தனர். இதனால் சனிக்கிழமை வழக்கத்தைவிட கூடுதலான போக்குவரத்து நெரிசலில் நான் சென்ற பேருந்தும் சிக்கிக்கொண்டது. ஜன்னலோர சீட் கிடைத்த சந்தோஷத்தில் சுவாரசியமாக வேடிக்கை பார்த்துக்கொண்டே செல்ல ஆரம்பித்தேன்.

மாநாட்டையொட்டி நகரில் ஆங்காங்கே தலைவர் அழைக்கிறார் பாணியில் விளம்பர பேனர்கள். இந்த மாதிரி விளம்பர பேனர்களில் காணப்படும் அரசியல் தலைவருக்கான சிறப்பு பட்டங்கள் சமயத்தில் சூடான பஜ்ஜி வைத்து சாப்பிடும் 3 நாளைக்கு முந்தைய தினத்தந்தியில் வரும் கள்ளக்காதல் விவகாரங்களை விடவும் வெகு சுவாரசியமாக இருக்கும். இன்றும் போக்குவரத்து நெரிசலில் 100 அடிகளுக்கு ஒருமுறை தயங்கி தயங்கி நின்று சென்ற பேருந்தில் நேரத்தை ஓட்டுவதற்கு வேறு வழியிலாமல் ஆங்காங்கே வைக்கப்பட்டிருந்த விளம்பர பேனர்களை படிக்க ஆரம்பித்தேன்.

யான் பெற்ற துன்பம் பெறுக இவ்வையகம் என்ற வலையுலக பழமொழிக்கேற்ப அந்த பொன்மொழிகள் உங்கள் பார்வைக்கும்.

புரட்சி கலைஞர் அழைக்கிறார்
(நோ கமெண்ட்ஸ்)

இருண்ட தமிழகத்தின் ஒளிவிளக்கே
(அப்போ சாலிகிராமம் மக்கள் கலைஞர் ஆட்சியோட கரண்ட் கட் பத்தி ஃபீல் பண்ணவே மாட்டாங்க)

வருங்கால தமிழகத்தின் விடிவெள்ளியே.
(அட!!!!!!!)

வருங்கால காமராஜர் அழைக்கிறார்.
(அடப்பாவமே அவரையும் விட்டு வைக்கலையா?)

வருங்கால முதல்வர் அழைக்கிறார்.
(ஒரு சீட்டுதானே இருக்கு. அதுக்கு எத்தனை பேருப்பா?)

கருப்பு எம்.ஜி.ஆர் அழைக்கிறார்.
(நல்லவேளை எம்.ஜி.ஆர் அப்பவே போயிட்டாரு)

பகுத்தறிவு பல்கலைக்கழகமே!!!!!
(அடக்கொடுமையே...)

தமிழகத்தின் நிரந்தர முதல்வர் அழைக்கிறார்
(முதலில் ஒருமுறை முதல்வர் ஆகுங்க. நிரந்தரம் பத்தி அப்புறம் பேசலாம்)

தமிழினத்தின் காவலனே..
(ஸ்ஸ்ஸ்ஸ்...ப்ப்பா...)

மாவட்டம்தோறும் இலவசமாக கம்ப்யூட்டர் தந்த தமிழகத்தின் பில்கேட்ஸ் அழைக்கிறார்.
(நல்லவேளை பில்கேட்ஸீக்கு தமிழ் தெரியாது)

இவ்வளவு கொடுமையையும் என் ரெண்டு கண்ணால் பார்த்ததில் கொஞ்சநேரத்துக்கு கண்ணெல்லாம் கலங்கி பார்வைமங்கி போனதைக்கூட பொறுத்துக்கிட்டேங்க.

ஆனால் அதுக்கப்புறம் கடைசியாக என் கண்ணுக்கு ஒரு பேனர் அம்புட்டுச்சு பாருங்க..

அதிலே அவர் ரீஜண்டா நடிச்சு வந்த படத்தோட(அரசாங்கம்னு நினைக்கிறேன்) போலீஸ் கெட்டப் ஸ்டில் ஒண்ணு சும்மா ஒரு 10 அடி உயரத்துக்கு பளபளன்னு. பத்தாததுக்கு இந்த ஹெல்மெட் யூஸ் பண்ற பார்ட்டியெல்லாம் போடுவாங்களே சின்னதாக ரவுண்ட் கேப். அதுமாதிரி ஒரு கேப் போட்டுக்கிட்டு நல்லா நச்சுன்னு ஒரு போஸ் கொடுப்பாரு.
(காலையிலே அவரத்துல எந்திரிச்சு வந்து தூக்ககலக்கத்துல அந்த ஸ்டில்லை பார்த்தால் வாட்ச்மேன் மாதிரியே இருக்கும் அப்படிங்கிறது வேற விஷயம்)

அந்த ஸ்டில்லுக்கு பக்கத்திலே வழ்க்கம்போல் ஒரு பொன்மொழி..

எவ்வளவோ படிச்சுட்டோம் இதைப்படிக்க மாட்டோமான்னு கொஞ்சம் தைரியத்தை வரவழைச்சுக்கிட்டு படிக்க ஆரம்பிச்சேன்.

அது........ அது...........

"தலைவா இதற்குபிறகும் உனக்கு ஆஸ்கர் விருது கிடைக்காவிட்டால் அது ஆஸ்கார் விருதை வழங்கும் அந்த அமெரிக்க குழுவுக்குத்தான் அவமானம்"


இப்ப சொல்லுங்க இதுக்கப்புறமும் தமிழ்படம் ஏதாவது ஆஸ்கார் விருது வாங்கனும்னு ஆசைப்படறீங்களா மக்கா?


டிஸ்கி: எனக்கு எந்த அரசியல்வாதி மீதும் தனிப்பட்ட விருப்பு, வெறுப்பு கிடையாது. ஒவ்வொரு தேர்தலிலும் காலையிலேயே 1 மணிநேரம் தவறாமல் வரிசையில் நின்று வாக்களித்து மீதி இருக்கும் நாளை டிவி யின் முன் வெட்டியாய்போக்கும் சாதாரண இந்திய குடிமகன் நான்.

hi.. hi.. ஒரு மீள்பதிவு..